2010-05-02

مواطن قفلت معاه

رجاءً ... رجاءً ... طولـــــــــو بالــكم شي شوي ...
.. هاد مرة موظف وقف عند البقالية يلي بيحارتو وأشترى شوية غراض عند الدفع طلب من صاحب البقالية أنو يسجلهن عليه بالدين فرفض صاحب البقالية وقلو ما بتعامل انا إلا بالكاش موني !!!! قلو الموظف متعجب: بدك كاش ؟؟ قلو صاحب البقالية أي ليش لأ ؟ فجاوبو الموظف : لأنو الكاش غير متوفر بالأسواق المحلية لأنه تجمع بأيدي شلة من الحرمية والحرمية صارو كتار والكترة غلبت الشجاعة والشجاعة كنز لا يفنى والكنز موجود بالمغارة وااالمغارة ما بتفتح إلا لعلي بابا والأربعين حرامي والأربعين حرامي صارو ملايين والملايين عم تندفع لضعاف النفوس رشوة والرشوة صارت حق والحق يا حسرتي ضاع وضاع معو الأكل والأكل ما عاد منو غذاء والغذاء مقابل النفط والنفط جاب البلا على روسنا وروسنا تمرمطت بالأرض والأرض مقابل السلام والسلام صار استسلام والاستسلام ضيّع الكرامة والكرامة خسر أدام الوحدة والوحدة صارت حلم والحلم سيد الأخلاق والأخلاق تحولت لنفاق والنفاق جمع نفق والنفق لازم يتكمّل ولحتى يتكمّل بدو متعهد بناء صالح وصالح ما عاد بهالأيام وبهالأيام صارت المفاهيم مقلوبة والمقلوبة بدها بيتنجان ولحمة واللحمة ماعادت تفوت لبيت الفقرا ولو نطحو الحيطان والحيطان صار ألها أدان وألأدان معبية البلد وهالبلد صار في أكل هوا والهوا صار فيي تلوث والتلوث عشعش بالنفوس،والسجل المدني والقضاء وللقضاء على القضاء صار بدو قضاء وقدر والقدر علينا مكتوب والمكتوب ما في منو هريبة والهريبة تلتين المرجلة والمرجلة ما عادت لكل واحد وكل واحد ألو ساعة والساعة أتية لا ريب فيها يوم يأخذ كل ذي حق حقه , الذي شفط منه في الدنيا وعلى الدنيا السلام مشان الحصول على الأختام والأختام عند المدام والمدام كانت شامية وهلأ صارت روسية شقرا والشقرا بتهز الأرض والأرض بتتكلم عربي والعربي ماحدا بيقدر عليه غير الله والله اذا منضل على هالحالة لتسحبنا الكلاب والكلاب أحسن من البني أدم وأدم علق علقة مصخمة مع حوا وحوا ما بتعرف غير كلمة بدي وبدي ألعن أبو هالحالة بطلت اشتري ....!!!!!!!

هناك 11 تعليقًا :

  1. ههههههههههه الله يعطيك العافيه اخي

    دمت بخيرر

    ردحذف
  2. بعد كل دى و لم يشترى

    ههههههههههههه

    بس بجد جميلة جداً

    جزاك الله خيراً

    ردحذف
  3. ههههههههههههههههه

    شايف على هالدنيا والله كلها مشاكل ونكد
    والفقير ما الو غير ربنا

    وتحياتي الك اتومنار
    على البوست الحلو

    ردحذف
  4. رنداالجنوبية شكرا لك على المرور الطيب تفبلي تحياتي

    ردحذف
  5. سلسبيل نورت صفحتي كل الشكر والتقدير اليك

    ردحذف
  6. دودي فلسطين مرورك وتعليقك اسعداني كتيرا شكرا لك

    ردحذف
  7. حلو جدا عجبنى كلامه

    ردحذف
  8. شكرا لك اختي مسلمة على المرور تقبلي تحياتي

    ردحذف
  9. هههههههههه

    راااائعة و تحكي عربي أيضا !!!

    منجي باكير

    ردحذف
  10. شكر لك اخي الكريم منجي باكير  مرورك وتعليقك اسعداني

    ردحذف
  11. رائعةهذه النقشة هههه

    تحياتي

    http://zaman-jamil.blogspot.com/2011/11/blog-post_25.html

    ردحذف

أعضاء الصفحة

متابعينا networkedblogs